BURONG
KAPAMPANGAN
Ding bulig king buslu metima
king playsdan
tanggalan mo asang saka kaliskisan
dayingan mo kaybat saka patiktikan
ketang miyanginan saka miyaslagan!
Abang payangyangan ding asan mu kaka
tumun nakang nasi itang medyu malpa
parimlan mung agad potang menangnang na
isaksak nong bulig kilub ning balanga!
Bayang sumlam agad ing
kekatang buru
misan metung aldo kalken meng mapinu
buburan meng angkak pangule malutu
managkat ne nyaman kenapang lawe mu!
Nung ala kang asan, paro metung tumpuk
detang mabye-bye sagiwa pa asbuk
piraglyan balatan lako iki't buntuk
saka mo basbasan asin a kapasyuk!
Nasing peparimla makanyan mu
naman
karin mo isaksak ding parong belatan
labi ning balanga masinup meng takpan
katlu, kapat aldo malyari nong takman!
Potang igisa me ing sinese
buru
manyaliksik arung ing bange nang banglu
sinyang me paroba miras ya pangulu
ligang balasenas kabage neng pihu!
Miyaliwa yapin ing awus keng
buru
ketapu kekami tagilo mebalu
balo-balo naman kasumangid baryu
nanu yaman lagyu maslam yapin banglu!
Obat piyaglon ya burung
Kapampangan
mamaslammaslam ya mamangemange man
obat manyaman ya't babye panimanman
king dilang mulagat tiktak ya linamnam!
Ing banglu ning buru ibat ya
king bange
ing kislap ning batwin ibat ya king benge
ing makasalikut malagung milage
oyning kabaldugan k'ganaganang bage!
